Bokanmeldelse. Det nordiske sivilsamfunnet sine utfordringar

Viss å spørje godt er halvt å vite, er den siste antologien om sivilsamfunnet frå den svenske tankesmien Sektor 3 ein sivilsamfunnspolitisk versjon av Mimes brønn.

Civilsamhället klämt mellan stat och kapitalHanna Hallin, Per Selle og Lars Trädgårdh (red). SNS Förlag, 2013

Er Norden det fremste døme på statsindividualismen, eller er den felles kulturen og historia vår sterke fellesskap? Alle politiske parti omfamnar sivilsamfunnet, betyr det at vi vil ha rom for eit sterkare sivilsamfunn i framtida? Samtidig ser vi at sivilsamfunnet endrar seg, mot meir profesjonalisering og mindre medlemsskap, betyr det at sivilsamfunnet står i fare? Antologien «Civilsamhället klämt mellan stat och kapital», redigert av Hanna Hallin, Per Selle og Lars Trädgårdh utforskar dei nordiske sivilsamfunna og «den nordiske modellen» frå veldig ulike vinklar. Innhaldet varierer i form og bodskap, men dei har eitt fellestrekk; nemleg at dei stiller gode og viktige spørsmål.